Вайна ва Украіне вярнула войскам усходняй Еўропы іх значэнне. Цяпер дзяржавы павінны трымаць свае мілітарныя сілы ў форме і параўноўваць іх з войскамі суседзяў. Вайна ўсё яшчэ найлепшая магчымасць для параўнання моцы, але найменш гуманная. Больш чалавечным спосабам выглядае статыстычнае супастаўленне. Індэкс глабальнай вайсковай моцы аналізуе больш за 50 чыннікаў, сярод якіх не толькі памер войска, але і геаграфічнае становішча або здабыча нафты.
Адначасова індэкс мае свае абмежаванні. Ён не ўлічвае якасці кіравання войскам або вайсковага абсталявання. Для беларусаў зусім не сакрэт, што значная частка нашых танкаў ці самалётаў больш прыдатная на парадах, чым падчас баявых дзеянняў. Болей за тое, дадзеныя ўвесь час змяняюцца. Напрыклад, Украіна павялічвае свой вайсковы бюджэт для вядзення антытэрарыстычнай аперацыі ў Данбасе.
